Se mèt Kò ki Veye Kò
Pep Ayisyen, Mayi nou nan Solèy, nou dwe Veye Lapli.
Evenman yo ki gen rapò ak peyi nou Ayiti prale pi vit pase jan nou te panse l. Depi apre gouvènman Ariel Henry-Fusion-SDP-MTV,Inite-
Mouche Guterres mande pou kominote entènasyonal la degaje l kon Mèt Janjak pou deplwaye yon « force robuste » pou vin mete lòd nan dezòd.
Yon lòt bò mouche Luis Almagro, nonm OEA nan Lima peyi Pérou, fè menm travay sa. Nan yon woumble OEA te genyen pawòl voye bòt fere nan peyi y’a pale tou. Men bò kote peyi OEA yo, tout pa wè koze sa menm jan.
Se konsa, genyen 19 nan peyi yo ki mete Yon Bémol. Yo dakò pou ede pèp Ayisyen. Men anvan tout koze fòs, tout zafè bòt fere, fòk Ayisyen yo ant yo menm deside kouman y ap rebat kat la. Fòk Ayisyen ant yo menm dakò sou kouman gouvènay peyi yo ap ye. Pou peyi Amerik latin sa yo, kominote entènasyonal la pa kapab ap foure nan gagann pèp Ayisyen okenn dirijan popetwèl, okenn dirijan fotokopi pou vin fè yon voup vap la. Apre sa, san anyen pa chanje, san kat la pa rebwase ou tande koze eleksyon pral pale. Y ap fè sanblan arete kèk ti grenn bandi, epi pa gen okenn lapwòptay ki fèt pou mete « hors d’état de nuire » tout gwo bandi, tout dealer dròg, tout moun ki kraze lajan peyi y’a nan CIRH, nan Petro Caribe, tout gwo kontrebandye anndan ladwann pou pèmèt Ayiti respire yon souf, se pral lave men siye atè.
19 peyi OEA sa yo, raple tout lòt yo sonje soti 1994 rive jounen nan moman nou ye la, Nasyonzini voye anpil misyon deja, fòs militè yo debake 2 fwa(oktòb 1994; fevriye 2004).
Misyon chanje siyati plizyè fwa. Rezilta Ayiti fè bak, Leta kraze, pèp nan mizè pi rèd, jenès la pèdi lespwa. Genyen peyi ki di ni Sekretè jeneral Nasyonzini an, Antonio Guterres, ni Sekretè jeneral OEA, Luis Almagro, yo pa nan okekn pike devan, yo pa nan okenn demach ki pi devan pwal ogmante pouvwa tout sila yo ki lakòz Ayiti malad nan eta sa, si n ta vle ranmase lide yo.
Se pou sa, nou menm Ayisyen, jwèt pou nou. Pawòl ki di « ou genyen pou foubi kò w, lè lòt la voye dlo sou ou pandan w ap benyen, nou dwe fè l tounen yon verite nan fason n ap ranmase pawòl 19 peyi OEA yo. Konsa se pou nou kontinye pwoteste, kontinye fè konnen nou pa dakò ak okenn pouvwa Ariel Henry ki se sous prensipal bandi yo, ki se sitirè kontrebandye yo, ki fin kraze Leta an jeneral aparèy jistis la sitou.
Se pou sa dyaspora yo gen pou fè manifestasyon, petisyon, lobby devan Nasyonzini, devan OEA, devan White House, devan Kongrè Meriken, devan Biwo Premye minis Kanada, devan Biwo Inyon Ewòp yo nan Bruxelles. Dyaspora yo dwe ekri tout Otorite yo konnen pou denonse sitirans gouvènman Ariel Henry y’a, collusion l ak moun kap vyole Dwa Fanm ak Timoun, ak bandi k ap vyole imilye fanm, timoun, moun k ap dechèpiyè Leta.
Nou menm anndan peyi y’a se pou nan tout depatman yo nou kontinye Leve kanpe. Se pou nou egzije moun Akò Montana yo pou to pale klè san mamòte, pou yo defini fèy wout la, pou yo esplike enstans k ap genyen pou kontwole gouvènman an.
Se pou ekip Montana di klè tankou klèwòz ki pinisyon, ki sanksyon ki rezève pou tout moun ki nan kad pouvwa Tranzisyon an fè wout kwochi ak lajan Leta, pou tout moun ki konnen y ap vin sèvi ak enfliyans yo pou pran avantaj sou do Leta.
Se pou ratdokale yo kit sa k nan pouvwa Ariel Henry y’a, kit sa k nan opozisyon nan moman konnen kat la pral rebat pou tout bon.
La vigilance sera de mise en toutes circonstances et partout. Gagòt nan tout sans epi sou tout fòm dwe fini nan peyi Dayiti.
Se pou sa, nou kwè 19 peyi OEA yo dwe kontinye egzije se demach Ayisyen ki pou devan. Ekip Ayisyen yo tou dwe konnen tan enpòtan anpil. Pa dwe genyen okenn trennen pye, nan desizyon k ap pran yo.
Mobilisation anndan peyi y’a nan tout depatman yo. Vijilans pou veye move zangui k ap vin jete la twoublay nan manifestasyon yo.
Dyaspora yo dwe kontinye sèvi ak tout mwayen yo genyen pou pote revandikasyon yo, pou fè tande vwa pèp Ayisyen. Pa dwe genyen okenn okipasyon pou vin kore pouvwa bandi, pou vin ranfòse enpinite nan peyi Toussaint Louvertute, Jean Jacques Dessalines, Sanite Belair ak Catherine Flon an.
Youn di lòt!
Youn kore lòt!!!
Nou pap kite yo janbe nou konsa!!!
Dyaspora yo jwèt pou nou!!!
Batay la mare. Jwèt la rèd. An n Veye mi nan Domino a.
Marcel Poinsard Mondésir
