Michel Martelly, 18 me pa yon okazyon pou di betiz, fè betiz ak pase peyi a nan betiz!

Michel Martelly, 18 me pa yon okazyon pou di betiz, fè betiz ak pase peyi a nan betiz!

Drapo m, se mòso twal ble ak wouj sa ki fè m konnen ke m egal ak ou, men m lè ou refize kon n sa.

Drapo m, se mòso twal sa nan dat 18 me 1803 ke zansèt nou yo te kite pou ou e pou mwoin.

Drapo m, se mòso twal sa ke w kontinye ap mache sou li jan w vle, lè ou vle.

E ou men m envite moun n ki pa renmen nou vin n sapata ak pilonnen li tou, chak fwa yo vle.

Drapo m se mòso twal ble ak wouj sa ki fè fyète nou an tan ke pèp.   Se 2 mòso twal sa ke m te renmen wè ap flote jodi an tout peyi an tankou nan Plèn n ak nan Matisan. Men malerezman nou tèlman divize nan defan n ti enterê pèsonèl, nou kite se bandi ki ap deside ki drapo ki pou monte, e ki bò pou li monte..

Drapo m se manifestasyon ak mobilizasyon sa ki genyen lakay chak gren n ayisye ki pa bandi ak zam ou ak kostim ki ap goumen pou peyi sa chanje, e kèlke swa kote ke yo ap viv sou planèt lan.

Fèt drapo m, se pa sa ke yon apatrid ki fin n bay zam nan katye popilè pou nou touye youn, lòt, epi kounye an vin n ap mande pou n vin n selebre fèt drapo ak li kay Tonton Sam. Apatrid sa, pa konpran n senbolik ak enpòtans fèt sa.

Fèt sa twòp enpòtan pou nou, pou n ta kite yon imowal, awogan, konwonpi ta vin n kontinye ap di betiz, fè betiz, epi pase peyi an nan betiz.

Ou pa k ab nan alo tès, alo tès, ap akòde jodi an, epi w pwal dezakòde demen maten. Si se sa ke w te kon n fè, epi ou kontinye ap fè, ou pa vrèman jan m konpran n sa zansèt nou yo te vle fè 18 me 1803.

Erezman gen patriyòt ki ankò konpran n peyi sa ak drapo li. Donk bòn n fèt drapo ak yo tout.

Bòn n fèt drapo ak ou menm ki pat siyen move akò sou do pèp lan

Bòn n fèt drapo ak ou menm ki pat distribiye zam nan katye popilè yo

Bòn n fèt drapo ak ou menm ki pat volè kòb Petro Karibe an.

Bòn n fèt drapo ak ou menm ki pap vòlè, vyole ak touye moun

Bòn n fèt drapo ak ou menm ki ankò kwè nan senbolik 18 me 1803 nan Akayè.

Ochan pou ou Papa Dessalines

Prof.  Esau Jean-Baptiste