OCHAN POU LILIANE

Liliane travèse.

Nou pantan, nou sezi

nou estomake, nou kriye

nou rele, men nou pa moli

Liliane se yon vanyan

ki pa janm pè di verite

menm lè sa mete lavi l andanje.

Vanyan tankou l se wololoy pou libète.

Se pou sa nou louvri yon bèl dra blan

pou nou di l : OCHAN.

Liliane ak diktatè tout kalte

se lèt ak sitwon.

Li fè yo pantan,

li se yon chanpyon

nan denonse aganman

kap fè gran panpan

olye yo fè Ayiti vanse. 

Kote Liliane kanpe

Van libète soufle

pou tout malere yap eksplwate,

pou tout fanm yap matirize oswa degrade nan move chante,

pou tout pitit soyèt kap chache avanse,

pou viktim tout kalte

kap chèche Jistis kont abi

pou tout yon pèp kap di :

Otan tèt mato, Otan chalatan

Lè a rive pou chanjman 

Mikwo Liliane se bonjan vitamin pou demokrasi,

Se limyè pou moun wè piklè ak je,

Se bay kou bliye pote mak sonje,

Se de je kontre manti fini. 

Liliane se yon repiblik zòrèy chak 4 trè

kap chache wout pou Jistis ak Lapè.

Li mete anpil kran pou Ayiti chanje

nan entere majorite

moun kap viv ladan l.

Li pran baton,

yo fèmen l nan prizon,

Li pati an egzil.

Men, tout sa te initil

pou kase detèminasyon l

Liliane batay pou lavi.

Men li mouri anba kèsere

nan yon peyi ki pa gen lasante ,

Batay la pa fini, li fenk kòmanse.

Nan memwa Liliane fòk lit la vanse

Pou Ayiti Liliane te reve a

tounen bonjan reyalite.

Liliane kite yon bèl egzanp kouman yon moun ka sèvi peyi l

san li pa okipe gwo pòs nan leta oswa kowonpi

Mèsi Lilli, ou mèt pati anpè

paske wap rete vivan nan kè n

                                                                                                      (Par l’organisation Reouvo Demokratik)